Yno i rieni pan fyddant ein hangen fwyaf, oherwydd ni all plentyndod aros

Y Blynyddoedd Cynnar Hanfodol

Yn Home-Start Cymru, mae ein strategaeth yn rhoi pwyslais cryf ar gefnogi teuluoedd sydd â phlant yn ystod blynyddoedd cynharaf bywyd eu plentyn, gan gydnabod mai hwn yw’r cyfnod hanfodol i feithrin perthnasoedd diogel, gwytnwch a lles gydol oes. Trwy gefnogaeth dosturiol dan arweiniad gwirfoddolwyr, rydym yn gweithio ochr yn ochr â theuluoedd sydd â phlant ifanc i’w helpu i ymdopi â heriau magu plant, cryfhau’r berthynas rhwng rhiant a phlentyn, a chreu amgylcheddau cartref cadarnhaol lle gall plant ffynnu. Mae mwy na hanner (52%) y teuluoedd rydym yn eu cefnogi yn cynnwys o leiaf un plentyn o dan bump oed, gan adlewyrchu ein hymrwymiad i ymyrraeth gynnar ac atal problemau rhag gwaethygu.

Mae ein heffaith yn glir:

• Mae 88% o rieni yn nodi gwell lles emosiynol a llai o unigedd.
• Mae 99% yn teimlo’n fwy hyderus yn eu sgiliau magu plant.
• Mae 76% yn teimlo’n fwy cysylltiedig â’u cymunedau.

Mae perthnasoedd teuluol yn gwella i 94% o’r rhai rydym yn eu cefnogi, tra bod 93% o blant yn profi gwell lles emosiynol.

Mae rhieni hefyd yn nodi mwy o hyder wrth reoli ymddygiad (61%), ynghyd â gwelliannau mewn parodrwydd ar gyfer yr ysgol (67%), datblygiad lleferydd ac iaith (75%), a chanlyniadau iechyd (100% lle nodwyd angen).

Gyda’i gilydd, mae’r canlyniadau hyn yn dangos sut mae cefnogaeth gynnar sy’n adeiladu ar gryfderau yn helpu teuluoedd i greu’r sylfeini sydd eu hangen ar bob plentyn ar gyfer dyfodol iach, hapus a llwyddiannus.

Canolbwyntio ar Ardaloedd o’r Angen Mwyaf

Lle bo modd, mae Home-Start Cymru yn targedu ei chefnogaeth tuag at deuluoedd sy’n byw mewn ardaloedd o’r angen mwyaf, gan ddefnyddio Mynegai Amddifadedd Lluosog Cymru (MALlC) i lywio ein cyrhaeddiad. Mae’r MALlC yn graddio ardaloedd daearyddol bach, a elwir yn Ardaloedd Cynnyrch Ehangach Haen Is (ACEHI), yn seiliedig ar ffactorau megis incwm, cyflogaeth, iechyd, addysg, tai a mynediad at wasanaethau, gan helpu i nodi cymunedau sy’n profi’r lefelau uchaf o anfantais. Drwy ganolbwyntio ar deuluoedd sy’n byw yn yr ACEHI mwyaf difreintiedig — yn enwedig mewn awdurdodau lleol mwy poblog lle mae’r angen mwyaf, gan gynnwys ardaloedd megis Caerdydd, Rhondda Cynon Taf ac Abertawe — rydym yn sicrhau bod ein cefnogaeth yn cyrraedd y rhai sy’n elwa fwyaf ar ymyrraeth gynnar.

Adlewyrchir y dull targedig hwn yn ein gwaith cyflenwi:

• Mae 51% o’r teuluoedd rydym yn eu cefnogi sydd â phlentyn o dan bump oed yn byw yn yr 20% o’r ACEHI mwyaf difreintiedig yng Nghymru.

Drwy flaenoriaethu’r cymunedau hyn, rydym yn gallu lleihau anghydraddoldebau, cryfhau gwytnwch a gwella canlyniadau i blant a theuluoedd a allai fel arall wynebu’r rhwystrau mwyaf i ffynnu.